Saturday, June 14, 2008

هذه حياتى



وحشتوني جداااااااااااااااا

يمكن اتأخرت عليكوا كتييييييييييير

بس ده غصب عني لاني

مكنتش عارفني انا تهت مني انا مش انا،

لا دي ملامحي ولا الشكل شكلي ولا ده انا. طبعا

قبل اي حاجه لازم نتعرف الاول،

قولولي بقي اساميكوا واحد واحد انا فااااااضي.........

كنت
محتار اكتب ايه في اول بوست

تكتب ايه يا واد يا محمد تكتب ايه يا واد...

يا واد اهه.. يا
واد ...خد ياد

... اخيرا قررت اكتب عن كل الناس اللي بحبهم.

وده لأنهم بكل بساطه يستحقوا

اني اتكلم عنهم وعلشان هم اكيد السبب

اني اسعد واحد في العالم لاني اعرفهم.

اولا

عيلتي ابويا وامي واخواتي صاصا و دودو

لانها اكيد اجمل عيله في الكون،ابويا ده بقي

حكايه... عمري ما شفت ولا هشوف راجل زيه،

هو طبعا اول صاحب ليا وأكيد من الناس

القليله اللى متمسكه بمبادئها وخوفها علي البلد ده

بقي غير خفه الدم الرهيبه،

امي بقي

اجمل واحن ام في الكون،

حاجه كده قشطه بالعسل، طيبه وعطاء من غير حدود.

دودو بقي

بسكوته البيت اختي الصغنونه اللي كبرت فجأه

واتخطبت واللي مش عارف ازاي ممكن

تبقي الحياه ماشيه من غير ما اشوف دودو كل يوم الصبح

وتتدلع عليا زي ما
بتعمل.

واخيرا صاصا بقي حب القلب والفؤاد اخويا الصغير

اللي هيفضل طووول عمره
صغير عندى

بس اكيد هو دماغ جامده وبرضه يمكن هو الوحيد

اللي نفسي يبقي احسن
مني مييييييت مره

، نفسي بجد يعرف انا بحبه قد ايه،

ربنا يكرمه ويحقق كل اللي في
نفسه.

ثانيا

طبعا هتكلم عن شريكه حياتي

واحلي حاجه في دنيتي ، نفسي اقولها انى ....

انتو مالكوا؟

محدش ليه دعوه هقولها ايه

هي عارفه كل حاجه بس هقول حاجه واحده

بجد ربنا يخليها ليا .

ثالثا

اصحابى

اللي هما اخواتي اصلا بس من جده واحده، طبعا

محدش فاهم حاجه مش مهم.

هتكلم عنهم بالترتيب من الاقدم للاحدث

زى ما خدنا كده في
التاريخ ...فى رابعه اول

فتحي:- اخويا وخطيب اختي ازاي بقي محدش يسألني بس

بجد انا بحب الواد ده لله فى لله

بصراحه الواد يتحب راجل وجدع وعارف ربنا كويس

حاجه كده تفرح انا بجد فرحان اننا بقينا اصحاب

ونسايب وطبعا دي اكبر ميزه تميزه عن
بقيه اصحابي.

عاصى:- عرفته بسرعه جدا لدرجه اني مش فاكر

انا عرفته ازاي
اصلا.

المهم.. اخويا عاصى بقي من اكتر الناس

اللي بعرف اتفاهم معاهم،طبعا راجل

وجدع وصاحب صاحبه يمكن هو حساس حبتين

لكن اكيد هو بيفهمنى كويس.

ربنا
يكرمه مع خطيبته و يارب نفرح بيهم قريب

يحيي قدري:-المعلم واستاذنا كلنا كل يوم

بيعلمنا حاجه جديده يمكن فى رأيى؛

بيكون ساعات حاد في قراراته بس ده علشان طيبته

اللي الناس استغلتها غلط

وعلى رأي المثل اللى يتلسع من الشربه ينفخ فى الزبادى

.يمكن احنا بقينا اخوات بسرعه اوى

لكن بجد نفسي نفضل كده على طول.

دول اهم تلت
شخصيات في حياتى .

فى ناس بقي انا بحبهم جدا لكن مبيحولوش يقربوا.

محمد
يحيي:- بحب الواد ده جدا بس هو ليه

اولويات تانيه وانا مقدر ده.

ورده :- دايما سلبي
في علاقاته ميحسسكش بأى اهتمام

بس بحبه جدا والله.

وطبعا في حاله خاصه جدا محيرانا كلنا (رجاله دكرنس)

هم يتحبوا كده كلهم على بعضهم،لوكشه واحده

كريم السعيد، ابو صلاح ،خالد
الحسيني،كريم موسى،مصباح.

ربنا يديمها عليهم ويفضلوا على طول
اصحاب.

وطبعا مانساش ليليو ربنا يكرمه

ويخطب بقي الانسانه اللي بيتمناها واللى ربنا

اكرمه بيها بجد،

لانها انسانه محترمه جدا ربنا يسعدهم.

وأخيرا شكر لوجود ناس هيبقوا في يوم اخواتي

سكايار في الغربة

أبو اليسر في شربين

عاشق الروح في مطروح .

رابعا

بنات عيلتنا

بقي دول ليهم معزه
خاصه عندي

لاني بحبهم زي اختي دودو بالظبط.

معلش طولت عليكو
.

بس هى دى حياتى وانا بحبها...... اوي